АЗИЯ, ЧАСТЬ есть света большая и изящнейшая; большая сего ради, яко превосходит далече Африку и Европу величеством; изящнейшая того ради, яко в ней Бог рай насади, человека сотвори и закон даде; в ней Земля обетованная, Христос родися, поживе, умре, и воскресе; от нея изыдоша первыи жители всея земли и моря, Звездочетцы и прочая учения. Оттуду всякия аромата, кадила, пряннии зелия, си есть благоуханныя корения, цветы и корицы, камение дражайшее и лучшее. Она всех Царств и Государств крепких материю еще древле нарицашеся, ради величества своего, воздуха мерна, остроумия человеческаго, богатых сокровищ и изобилия всякаго добра. Тамо Царствия цветоша Ассириянов, Мидов, Персов, Парфов. Тамо Тартария, Китая, Хина, Персия, Аравия, Идумеа, Сириа, Финикиа, Ассириа, Келесириа, Каппадокиа, Пафлагониа, Вифиниа, Троада, Иониа, Кариа, Ликиа, Памфилиа, Киликиа и Татаре, от них же Храбрый Царь и Великий Князь Московский Иоанн Васильевич многое множество к православной вере обрати, и пристяжа с Царствы Астраханским и Казанским, иже и доныне с прочими многими Государствы под величайшаго государства Московскаго благополучною властию суть. Придаетже ся к сей великой Азии и вторая меньшая Азия, или Натолия; а в той заключается вся страна, яже есть между Евфратом и морем зовомым Эгеум, разделена от Турков на четыри Башовствия; ту Фригия, Лидия и Ликаония, Армения, Иверия, или Грузинское Царство и прочая.

АФРИКА ТАКОЖДЕ часть есть всея земли, назвася от Афра, единаго из племени Авраамова. Иныи сказуют, яко наречеся Африка, аки бы Априка по толкованию Словенскому отверзтая; есть бо отворена и паче иных обращена к солнцу, образом же треугольна; от полунощи определяется морем Влоским, от запада и полудне Окианом, от Востока Чермным морем. Ту Египет, Ефиопия, Кафрария, страна Муринска, Мавритания, Нубия, Ливия, Варвария, и Царства Фессинское, Маррохинское, Моногумугов, Мономотапов, Адель, Конго и прочая.

ЕВРОПА ЕСТЬ часть округа земнаго, яже в долготу идет от предела Португалии до реки Танаис или Дону; в широту же от Архипелага, сиречь междуземнаго моря до Окиана Гибернитскаго; содержит в себе преславныи и крепкии Государства, богатства, и велие множество людей храбрых, сильных и мудрых, и к обитанию есть здрава и добра; в ней Греция, Фракиа, идеже Константинополь; Таврика, идеже Татаре Перекопскии, Славяне, Русь, Москва, Польша, Литва, Мазовша, Жмудь, Курляндиа, Лифлянты или Ливония, Прусы, Чехи, Слионско, Морава, Венгры, Волохи, Молдавская, Сербская, Болгарская и Босненская Земля, Далмация, Албаниа, Ахаия, Ишпаниа, Арагониа, Каштилия, Франциа, Британиа или Англиа, Лотарингиа, Буркгундиа, Италиа, Ерманиа или Немецкая земля, Романиа, Нидерланды, Брабантиа, Голландиа, Бавариа, Свевиа, Саксониа, Даниа, Готты, Шведы, Лаппиа, Ботниа, Финландиа, Тартариа меньшая, и прочая, их же неудобь подробну списати совершенно вкратце. Еще же есть и четвертая часть вселенныя, Америка, яже нарицается Новый Свет: но яко сия послежде прочиих ново изобретена и к сему предложению мало что ключима, сего ради без описания оставляется.