41.

О КРЕЩЕНИИ ВЛАДИМИРА

и о браце его.

И ТАКО ВЕЛИКИЙ САМОДЕРЖЕЦ Российский Владимир Светославич православнохристианскую Греческую веру приемши, повеле себе окрестити в Херсоне, лета от создания Мира 6416, а от рожества Христова 988; а по Кромерову свидетельству, лета от сотворения Света 6417, а от рождества Христова 989. Егда же нача креститися, бысть преславно чудо. Ибо коль скоро Владимир вступи во святую купель и Архиепископ Корсунский возложи нань руку благословляя его, да приимет Духа Святаго, абие от очию его слепота, аки чешуя спаде, и прозре ясно, аки никогда же боляше очима, и возда хвалу Богу в Тройце Святой славимому, глаголя: ныне познах истиннаго Бога; и дано ему имя на святом крещении ново, Василий. Тогда же крестишася при нем Боляре его и все воинство Росское. По сем Владимир сочетася браку с Анною Царевною и бысть веселение брачно и радость всемирная. Постави же в Корсуне и Церковь каменную Святаго Василия, в память имени своего крещеннаго, и возврати Херсон и Кафу и всю Таврикию Кесарем Греческим, Константину и Василию, а сам сотворши к ним целование и вземши благословение и Митрополита Михаила от Святейшаго Патриарха Цариградскаго Сергия, пустися водою до устия Днепра. Егда же прихождаше в Киев с новобрачною женою своею Анною, народ Киевский изыйде в сретение ему с велиею радостию; а Владимир привезл с собою и мощи Святаго Священномученика Климента и ученика его Агафаггела и иных много, такожде иконы, сосуды и различныя утвари Церковныя, и Протопопа Херсонскаго Анастасиа и многия Презвитеры, Диаконы, клирики, певцы, иноки и всякия мастеры созидания ради святых Божиих Церквей от Греческаго благочестиваго государствия приведе.